FRANZ GAUBATZ (Gedicht9

---

Wie`s frieher war

Denkt mr nur an friehri Zeite,
no krampft`s sich zamm es Herz,
die Jungi, die kenne uns beneide,
was wisse die vun Freid un Schmerz!

Domols war`s ganz anerscht noch,
die Welt war jung - un so aa mir,
die Luft war sauwr un hat gut groch,
un gsund war alles, Mensch un Tier.

Sogar dr Himml war scheer bloo,
die Sunn wärmr, die Sterne heller,
die Leit han net so viel glooe,
un voll war Haus un Hof un Keller.

Mir ware ausgelass un han getobt,
die Welt war scheen un friedlich,
uns Jungi hat mr nare globt,
mir ware fleißich, brav un niedlich.

Musich hat gschpielt, mir han gesung,
han getanzt un ware arich luschtich,
mir han de Kirweihboom ins Dorf gebrung
un getrage de Kirweihstrauß, de duftig.

Unser Eltre ha`mr arich eschtemiert
un reschpektiert die anri Leit,
mir han uns wie sich`s g` hert ufgfiehrt,
un darum war`s so scheen in sellr Zeit!